Arredor de medio centenar de persoas participa esta semana na Universidade de Vigo na primeira xuntanza en Europa do proxecto Ibero4Jobs. A iniciativa reúne a especialistas de universidades e organismos de Colombia, México, Portugal e España co obxectivo de mellorar os procesos de integración entre o ámbito académico e o empresarial, creando pontes entre eles que fomenten a empregabilidade do alumnado.
Lanzado en maio de 2023, o proxecto conta coa participación por parte europea da Universidade de Vigo, a Fundación Ronsel e o Instituto Politécnico de Porto (Portugal). Xa na parte iberoamericana, de Colombia están a Universidad de Caldas, a Universidad Autónoma de Manizales, a Cámara de Comercio de Manizales por Caldas e a Fundación Luker; e de México a Universidad Autónoma de Nayarit e a Universidad Tecnológica de Nayarit. Está financiado con arredor de 775.000 euros polo programa Erasmus+ da Unión Europea e coordinado pola Universidad de Caldas. O propósito da iniciativa é “mellorar a empregabilidade do alumnado das universidades socias, fortalecer as capacidades actuais das institucións participantes e transferir coñecemento que lles permita desenvolver as súas propias estratexias de conexión co tecido empresarial”.
Para acadar este obxectivo, Ibero4Jobs aposta por mellorar os procesos de integración entre a academia e o sector empresarial e produtivo mediante a transferencia de metodoloxías e boas prácticas das universidades europeas ás institucións de educación superior latinoamericanas. Así, parte da premisa de que “as universidades europeas contan con modelos de éxito en formación teórica e práctica que facilitan a transición da aprendizaxe ao emprego e dan resposta ás competencias e necesidades que demanda o mercado laboral, favorecendo a empregabilidade da mocidade”. Neste contexto, os socios participantes consideran que “traballar conxuntamente é fundamental para que as acciones, esforzos e capacidades de ambas partes impacten no desenvolvemento sostible das rexións e reduzan as fendas de desemprego na xente nova”.
Coñecendo boas prácticas
A primeira Semana de Estudo e Inmersión do proxecto arrancou este luns e martes no campus de Ourense, na Facultade de Educación e Traballo Social, e continuará o mércores e xoves no campus de Vigo. Amosando a súa satisfacción por acoller esta actividade, a coordinadora de Ibero4Jobs na Universidade de Vigo, a profesora da citada facultade Maribel Doval, explica que os obxectivos deste encontro son profundar no coñecemento de boas prácticas na temática do proxecto mediante “o diálogo activo e o traballo cooperativo e participativo entre os socios europeos e iberoamericanos”. Igualmente, a programación céntrase en perfeccionar as habilidades do profesorado iberoamericanos en relación con estas prácticas, “equipándoos para elaborar e prototipar solucións para as súas respectivas universidades e organizacións, influenciadas polos paradigmas europeos na materia”.
As sesións de traballo arredor do proxectos compleméntanse esta semana coa celebración de diferentes talleres con entidades, como Feuga, e visitas de interese, como á Confederación Empresarial e a Deputación de Ourense ou ao observatorio Nautilus, no porto de Vigo. Os socios tamén teñen a oportunidade de coñecer de primeira man as facultades, escolas e traballo investigador da UVigo e diferentes empresas. As delegacións participantes de Ibero4Jobs continuarán a vindeira semana o seu traballo na sede do outro socio europeo desta iniciativa, o Instituto Politécnico de Porto (Portugal).
Ver Noticia
ES 
EN 
PT